Friday, October 28, 2016

ချွေးထွက်ပြီးနောက် အနံ့ဆိုးတွေ ဘာကြောင့် တစ်ခါတစ်ရံ နံရတာလဲ


 အနံ့ဆိုး ထွက်တာဟာ ချွေးကြောင့်မဟုတ်ဘူး ဆိုတာကို သင်သိရင် အံ့သြကောင်း အံ့သြပေလိမ့်မယ်။ ချွေးဟာများသောအားဖြင့် ရေနဲ့ဆားပဲ ဖြစ်ပါတယ်။ သဘာဝဖြစ်စဉ်မှ ထွက်ရှိတဲ့ စွန့်ပစ်ဒြပ် ပစ္စည်းလေးတွေ အမျိုးမျိုး စုစည်းပါဝင်မှုတော့ ရှိပါတယ်။

အနံ့အသက်က သင့်အရေပြားပေါ်မှာ နေထိုင်တဲ့ ဘက်တီးရီးယားတွေဆီကနေ လာတာပါ။ အဲဒီဘက်တီးရီးယားတွေက သင့်ရဲ့ချွေးကို ပျက်ပြားအောင် စတင်ပြုလုပ်တဲ့အခါမှာ သူတို့က မနှစ်မြို့ဖွယ် အနံ့ဆိုးတစ်မျိုးကို ထုတ်ပေးတယ်။ ကံကောင်းတာက အဲဒီနံစော်တဲ့ အကျိုးဆက်ဖြစ်ပေါ်မှုကို ရေချိုးတဲ့အခိုက် ရေတို့ဆပ်ပြာတို့နဲ့ ဆေးကြောလိုက်ရင် ပျောက်နိုင်ပါတယ်။

တကယ်တမ်းကျတော့ အက်ကရိုင်းဂလင်း  (Eccrine gland) (ပြွန်စီး ဂလင်း)တွေနဲ့ အက်ပိုကရိုင်းဂလင်း (Apocrine gland) (မွေးညင်းအပေါက်တွေမှာရှိတဲ့ ဂလင်း) တွေဆိုပြီး ကွဲပြားခြားနားတဲ့ ချွေးဂလင်းတွေ နှစ်မျိုး ရှိပါတယ်။ အက်ကရိုင်းဂလင်းတွေ ကိုတော့ သင့်ရဲ့ခန္ဓာကိုယ်အနှံ့အပြားမှာ တွေ့ရှိနိုင်ပါတယ်။ အက်ပိုကရိုင်းဂလင်းတွေ ကတော့ များသောအားဖြင့် သင့်ချိုင်းကြားတွေနဲ့ ပေါင်ခြံနေရာတွေမှာ စုစည်းတည်ရှိနေပါတယ်။

အက်ပိုကရိုင်းဂလင်းတွေဟာ အသင်ပျိုဖော်ဝင်ချိန်၊ လူလားမြောက်ချိန်ကျမှ အထူးသဖြင့် နိုးကြွားထကြွလာကြတာ ဖြစ်ပါတယ်။ အဲဒီအချိန်အတောအတွင်းမှာ ပုံမှန်ထက်ပိုမိုတဲ့ ဟော်မုန်းဓာတ်တွေကို သင့်ရဲ့ခန္ဓာကိုယ်က ထုတ်လွှတ်ပေးတဲ့ အတွက်ဖြစ်ပါတယ်။ ပြီးတော့ အပိုဆုမေတ္တာ လက်ဆောင်တစ်ခု အနေနဲ့ အက်ပိုကရိုင်းဂလင်းတွေက ပရိုတင်းဓာတ်တွေ၊ အဆီများတဲ့ အက်စစ်ဓာတ်တွေ ပါဝင်တဲ့ ကွဲပြားခြားနားတဲ့ ချွေးတစ်မျိုးကို ထုတ်ပေးပါတယ်။

အဲဒီချွေးနဲ့သင့်ရဲ့အရေပြားပေါ်က ဘက်တီးရီးယားတွေ ပေါင်းစပ်လိုက်တဲ့အခါ အထူးသဖြင့် နံစော်တဲ့ အနံ့တစ်မျိုးရှိတယ်။ “ကိုယ်နံ့၊ ချွေးနံ့”လို့ ပြောကြတဲ့ အနံ့ပေါ့။

အပျိုဖော်ဝင်ချိန် မရောက်သေးတဲ့ ကလေးငယ်တွေ ဟာလည်း အရမ်းကြီး နံစော်မှုမရှိတဲ့ ချွေးတွေအများကြီး ထွက်နိုင်ပါတယ်။ သူတို့ရဲ့ ချွေးအများစုဟာ ပိုမိုပြင်းထန်တဲ့ အက်ပိုကရိုင်းဂလင်းတွေကနေ လာတာထက်၊ အက်ကရိုင်းဂလင်းတွေကနေ လာကြတာ ဖြစ်ပါတယ်။ အက်ပိုကရိုင်းဂလင်းတွေ ကလည်း အပျိုဖော်ဝင်ချိန် မရောက်မချင်း တကယ်တမ်းဖွံ့ဖြိုးမှု မဖြစ်သေးပါဘူး။ များပြားလှတဲ့ အက်ပိုကရိုင်းဂလင်းတွေ ချိုင်းကြားမှ ရှိတာ ရှင်းနေပါတယ်။

ဒါကြောင့် လူတွေဟာ ချွေးနံ့ပျောက်ဆေးတွေ၊ ချွေးတိတ်ဆေးတွေကို အခြားနေရာမှာ မလိမ်းဘဲ အဲဒီနေရာမှာ လိမ်းကြတာပေါ့။ စကားမစပ် ပြောရရင် ချွေးနံ့ပျောက်ဆေးတွေက အသင်ချွေးထွက်နေတာကို ရပ်တန့်သွားစေတာတော့ မဟုတ်ပါဘူး။ ဒါပေမဲ့ အနံ့ဆိုးကို ထွက်စေတဲ့ ဘက်တီးရီးယားပိုးတွေကိုတော့ လျော့ပါးပြီး အာနိသင် ပျက်ပြယ်သွားစေတယ်။

ချွေးတိတ် ဆေးတွေက အသင်ချွေး မထွက်အောင် ဟန့်တားရင်း တကယ်တမ်းကျတော့ ချွေးပေါက်ကလေးတွေကို ပိတ်ဆို့ပေးလိုက်တာ ဖြစ်ပါတယ်။ ချွေးထွက်စိုရွှဲ မနေစေဖို့နဲ့ ချွေးနံ့ပျောက်ဖို့ အတွက်ပါ လူတော်တော်များများက ချွေးတိတ်ဆေးတွေကို ပိုမိုနှစ်သက်နေကြစေကာမူ ကျွမ်းကျင်သူ ပညာရှင်တွေ ကတော့ ချွေးထွက်တာ ကောင်းတယ်လို့ ယုံကြည်ယူဆကြပါတယ်။

ချွေးပေါက်တွေကို ပိတ်ဆို့ထားမယ့် အစား သဘာဝအတိုင်း ထားမယ်ဆိုရင် ချွေးတွေက ခန္ဓာကိုယ်က စွန့်ပစ်ရမယ့် ဓာတ်ပစ္စည်းတွေကို သင့်ခန္ဓာကိုယ်ပြင်ပသို့ ပို့လွှတ်ပေးမှာ ဖြစ်တယ်လို့ ပညာရှင်တွေက ယူဆကြတာ ဖြစ်ပါတယ်။

ဆရာဦးသိန်းလွင်၏ “မြေးကလေးတို့ အမေး၊ ဘိုးဘိုးရဲ့အဖြေ သုတပဒေသာ အဖြာဖြာ”စာအုပ်မှ ကောက်နုတ်ထားပါသည်။

messengernewsjournal မှ ကူးယူဖော်ပြသည်။
www.myanmarkidworld.com