Sunday, October 16, 2016

အရင်တုန်းက ဇာတ်ကားတွေဟာ ခုလက်ရှိဇာတ်ကားတွေထက် ကွာလတီရော၊ ဇာတ်အိမ်ပါ ပိုကောင်းကြောင်းဖွင့်ဟသွားတဲ့ ရတနာဗို


  ကျန်းမာရေး မကောင်းလို့ ၀ိတ်ကျသွားတဲ့ရတနာဗိုက အစားသောက်ပျက်ပြီးပင်ပန်းတာကြောင့် ကိုယ်ခံအားကျပြီး နေမကောင်းဖြစ်တယ်လို့သိရပါတယ်။ ဒါ့အပြင် ရှုတင်တွေလဲဆက်တိုက်ဖြစ်နေသလို ဇာတ်လမ်းတွဲ၊ ရုပ်ရှင်ကားကြီးများလဲ လက်ခံထားတယ်လို့သိရပါတယ်၊ လက်ရှိ လှုမှုကွန်ယက်ပေါ်က မြန်မာကားဝေဖန်မှုတွေအပေါ် သူမရဲ့ အမြင်ကိုလဲပြောပြသွားပါတယ်။

"လူတိုင်းကတော့ ကိုယ့်အလုပ်၊ ကိုယ့်နယ်ပယ်မှာ အကောင်းဆုံးဖြစ်ချင်ကြတာပဲပေါ့။ ဒီလိုပဲ အနုပညာသမားလဲ ကိုယ့်အနုပညာမှာ အကောင်းဆုံးဖြစ်ချင်ကြတယ်။ စီးပွားရေးသမားလဲ စီးပွားရေးမှာ အကောင်းဆုံးဖြစ်ချင်ကြတယ်။ အကုန်လုံးကတော့ ကြိုစားနေကြတာပဲ။ ပရိသတ်တွေဝေဖန်တာပြောတာ၊ ဆိုတာက တချို့အရာတွေလဲ မှားတယ်လို့မပြောပါဘူး။ မှန်တာလေးတွေလဲ ရှိပါတယ်။ သူတို့ဖက်ကလဲ တိုးတက်စေချင်လို့ပြောတာပေ့ါနော်။ အဲ့ဒီအတွက် ညီမတို့ဖက်ကလဲ အနုပညာလောကကို ဒီ့ထက်ပိုပြီး တိုးတက်အောင်အနုပညာအရည်အချင်းတွေလဲ အဆင့်မြင့်မြင့်ဖြစ်အောင်လို့ဒီ့ထက်ပိုပြီးအများကြီးကြိုးစားပါ့မယ်။ ကိုယ်ဒီမှာ သုံးနိုင်တဲ့ငွေရေးကြေးရေးပမာဏနဲ့အနုပညာကိုလုပ်နေရတဲ့အချိန်လေးမှာ ပရိသတ်ကြီးအနေနဲ့နားလည်ပေးစေချင်ပါတယ်။ နိုင်ငံကြီးတိုးတက်လာတာနဲ့အမျှ အနုပညာလဲတိုးတက်လာမယ်ဆိုတာ ညီမယုံကြည်ပါတယ်"တဲ့။

ဟိုးရှေးခေတ်ကဇာတ်ကားတွေကောင်းခဲ့သလောက် ဒီဖက်ခေတ်ဇာတ်ကားတွေက ကော်ပီရိုက်ကူးလာကြတဲ့အပေါ်မှာလဲ "ညီမထင်တာကတော့ ဈေးကွက်ကွာသွားတယ်ထင်တယ်။ ရှေးတုန်းကဇာတ်ကားတွေဟာ တကယ်လဲကောင်းခဲ့တယ်။ တကယ်လဲ ကွာလတီမှီတယ်။ တကယ်ကားတစ်ကားကိုကြည့်လိုက်ရင်လဲ ရင်ထဲမှာခံစားသွားရတယ်။ အဓိက ဈေးကွက်လဲအရင်တုန်းကလောက် မကောင်းတော့သလို ဈေးကွက်လဲကွာသွားတယ်။ အရင်ကတော့ ဇာတ်ညွှန်းကောင်းကောင်း တည်ဆောက်ကြတယ်။ ဇာတ်အိမ်ကောင်းကောင်း တည်ဆောက်ကြတယ်။ အချိန်ယူပြီးငွေရေးကြေးရေး အကုန်ခံပြီးရိုက်ကြတယ်။ အဲ့ဒီအတွက်ထွက်လာတဲ့ ကွာလတီကလဲကောင်းတယ်။ ဇာတ်ကားလေးတွေကပညာလေးလဲရတယ်။ အဲ့ဒီတော့ ပရိသတ်ကြည့်ရင် တစ်ခုခုကျန်ခဲ့တယ်။ ရှေးကားတွေကတော့ တကယ်လဲကောင်းခဲ့ပါတယ်။ အခုဒီဖက်ခေတ်ကျတော့ ဈေးကွက်ကလဲ မကောင်းတော့ဘူးဖြစ်လာတယ်။ ဈေးကွက်မကောင်းတဲ့အတွက်ငွေရေးကြေးရေးသုံးစွဲမှုမှာလဲ ထုတ်လုပ်ရေးတွေက ချုံ့လာကြတယ်။ ဇာတ်လမ်းဇာတ်အိမ်လေးတွေကလဲ ကော်ပီလေးတွေလဲများလာကြတော့ ပရိသတ်အတွက်ပြောစရာလေးတွေဖြစ်လာတာပေါ့။ အဲ့ဒီအတွက်ဒီ့နောက်ပိုင်းတော့ ရုပ်ရှင်သမားတွေလဲငွေရေးကြေးရေးနဲ့ပတ်သက်ပြီးသေချာသုံးနိုင်အောင်၊ ဇာတ်လမ်းဇာတ်အိမ်ကောင်းကောင်းနဲ့ဇာတ်ကားကောင်းတွေထွက်လာအောင်အားလုံးဝိုင်းဝန်းပြီးကြိုးစားနေကြပါတယ်"လို့ သူမက ပြောပြသွားပါတယ်။

ဒါ့အပြင်သီတင်းကျွတ်ကိုတော့ ရန်ကုန်မှာပဲဖြတ်သန်းမှာဖြစ်ပြီး တန်ဆောင်တိုင်ကျမှ မွေးရပ်မြေ မန္တလေးကို အလည်ပြန်ဖြစ်မယ်လို့ပြောလာတဲ့ ရတနာဗိုဟာ လက်ရှိမှာတော့ လူမင်းနဲ့အတူ မျက်ရည်ဖက်ရှင်ဆိုတဲ့ ကားလေးမှာ ပါဝင်သရုပ်ဆောင်နေပါတယ်။

trend myanmar  မှ ကူးယူဖော်ပြသည်။
www.myanmarkidworld.com