Monday, October 24, 2016

မနေ့ကဖြစ်သည် ဇာတ်လမ်းတွဲမှာ ပါဝင်သရုပ်ဆောင်နေတဲ့ ယွန်းယွန်းက သူမရဲ့အနုပညာလှုပ်ရှားမှုအကြောင်းတွေကို ခုလိုဖွင့်ဟလာ


   ဆယ်တန်းကို ဂုဏ်ထူးနှစ်ခုနဲ့အောင်မြင်ပြီးနောက်ပိုင်းမှာ Day ရော အဝေးသင်ရော လျှောက်ထားတယ်လို့ပြောလာသူလေးကတော့ ကလေးသရုပ်ဆောင်ဘ၀ကနေ လက်ရှိ ဆယ်ကျော်သက်အပျိုဖြန်းလေး ဘ၀ရောက်လာသည့်တိုင် ပရိသတ် ချစ်ခင်အားပေးနေတဲ့ ယွန်းယွန်းပဲဖြစ်ပါတယ်။ သူမဟာ လက်ရှိမှာ Business Management နဲ့ပတ်သက်တဲ့ ကျောင်းကိုတက်ရောက်နေပြီး တစ်ဖက်ကလဲ အနုပညာကို အားသွန်ခွန်စိုက်ကြိုးစားနေသူလဲဖြစ်နေပြန်ပါတယ်။ သီတင်းကျွတ်ကိုတော့ အဖိုးအဘွားတွေကို ကန့်တော့ရင်းဖြတ်သန်းခဲ့ပြီး ရေကျော်ပွဲဈေးတစ်ရက်လျှောက်ဖြစ်ခဲ့တယ်လို့ပြောပြလာတဲ့သူမရဲ့ လက်ရှိမှာရိုက်ကူးနေတဲ့ ဇာတ်လမ်းတွဲအကြောင်းနဲ့ အနုပညာရေးရာအကြောင်းများကို ပြောဆိုမေးမြန်းဖြစ်တဲ့အခါ

-အခုလက်ရှိ အနုပညာလှုပ်ရှားမှုလေးကိုလဲ သိချင်ပါတယ်။

လတ်တလောက MRTV 4 အတွက် မနေ့ကဖြစ်သည်ဆိုတဲ့ ဇာတ်လမ်းတွဲလေးရိုက်ပေးဖြစ်နေပါတယ်။ အဲ့ဒီ ဇာတ်လမ်းတွဲကလျှို့ဝှက်သဲဖို ဇာတ်လမ်းမျိုးလေးပေါ့။ ယွန်း ဒါနဲ့ဆို ဇာတ်လမ်းတွဲရိုက်တာ နှစ်ခုရှိပါပြီ။ ပြီးတော့ အားတဲ့အချိန်လေးတွေမှာ ကြော်ငြာလေးတွေရိုက်ဖြစ်နေတယ်။ နောက်ယွန်းကျောင်းလဲတက်နေတယ်ဆိုတော့လေ။ အနုပညာပိုင်းရော၊ ပညာရေးပိုင်းကိုရော မျှပြီးလုပ်ဖြစ်နေပါတယ်။

-မနေ့ကဖြစ်သည်ထဲမှာပါဝင်တဲ့ ယွန်းရဲ့ကာရိုက်တာလေးကိုလဲသိချင်ပါတယ်။

အရှေ့ကဇာတ်လမ်းတွဲက ၀ါစိမ်းနီ အဲ့ဒီထဲမှာက ကျောင်းသူကာရိုက်တာလေးပဲ။ အခုကားကတော့ လျှို့ဝှက်သဲဖိုဇာတ်လမ်းမျိုး တစ်ခါမှလဲမရိုက်ဖူးသေးဘူး။ အဲ့ဒါကြောင့် သေချာလေးဂရုစိုက်လုပ်ဖြစ်တယ်။ ယွန်းကလေးသရုပ်ဆောင်မဟုတ်တော့ပဲနဲ့ အပြင်က ၁၆ နှစ်အရွယ်ကောင်မလေးတစ်ယောက်ရဲ့ ကာရိုက်တာကို သရုပ်ဆောင်ထားပါတယ်။ အပြင်နဲ့ဆို သိပ်မကွာဘူးပေါ့။

-မနေ့ကဖြစ်သည် ဇာတ်လမ်းတွဲလေးကို လက်ခံဖြစ်တာကရော ဘယ်လိုကြောင့်လဲ။

ဇာတ်လမ်းဖတ်လိုက်တဲ့အခါမှာ ဇာတ်လမ်းက ပရိသတ်တွေကို ဆွဲဆောင်နိုင်တယ်။ ပြီးတော့ ပညာပေးသဘောမျိုးလဲပါတယ်ဆိုတော့ ကိုယ်ကိုတိုင်လဲ စိတ်ဝင်စားတယ်။ ပြီးတော့ကိုယ့်ကာရိုက်တာအပေါ်မှာလဲ သဘောကျတဲ့အတွက်လက်ခံဖြစ်တာပါ။ ပြီးတော့သူတို့အတွက်လဲ နေ့ရောညရော ရိုက်ပေးပြီး အကောင်းဆုံးပရိသတ်ကိုပေးချင်တဲ့စေတနာနဲ့ကြိုးစားနေပါတယ်။ ထွက်လာရင်လဲကြည့်ရှုပြီး ဝေဖန်ပေးပါလို့ပြောချင်ပါတယ်။

-သီတင်းကျွတ်မှာရော ဘာတွေလုပ်ဖြစ်သေးလဲ။

နှစ်ဖက်ဖိုးဖိုး ဘွားဘွားတွေကို လိုက်ကန့်တော့ဖြစ်တယ်။ ထူးထူးခြားခြားကြီးတော့ယွန်းသိပ်မလုပ်ဖြစ်ဘူး။ အိမ်မှာပဲနေဖြစ်တယ်။ ပြီးတော့ အဲ့ဒီနေ့က အိမ်မှာ ဘုရားအနေကဇာတင်တယ်။ ဘုန်းကြီးဆွမ်းကပ်တယ်ပေါ့။ ရေကျော်ပွဲဈေးတစ်ရက်သွားတယ်။ ဒီလောက်ပါပဲ။ တခြားထွေထွေထူးထူးတော့မလုပ်ဖြစ်ပါဘူး။

-တန်ဆောင်တိုင်ကိုရော ဘယ်လိုဖြတ်သန်းဖြစ်မလဲ။

တန်ဆောင်တိုင်ကတော့ မသေချာသေးဘူး။ ဇာတ်လမ်းတွဲကလဲ မပြီးသေးဘူးဆိုတော့လေ။ ဒါပေမဲ့ ထူးထူးခြားခြားကတော့ သိပ်လုပ်ဖြစ်မယ်မထင်ပါဘူး။ ရှုတင်ရယ်၊ အိမ်ရယ်၊ ကျောင်းရယ်ပါပဲ။

-ယွန်းပညာရေးနဲ့ပတ်သက်ပြီးတော့ရော ဘာလျှောက်ထားဖြစ်လဲ။

အဝေးသင်ရော၊ Day ရော နှစ်မျိုးစလုံးလျှောက်ထားတယ်။ ဘယ်ဟာကျမလဲတော့မသိသေးဘူး။ အဲ့ဒီအပြင်ကို အခု UK က ကောလိပ်တစ်ခု Buissness Management ကိုတက်နေပါတယ်။

-နောက်ထပ်ဘာတွေလက်ခံထားတာရှိဦးမလဲ။

ဒီဇာတ်လမ်းတွဲမပြီးမချင်းတော့ တခြားဟာတွေ လက်ခံဖြစ်မှာ မဟုတ်ပါဘူး။ ဇာတ်လမ်းတွဲပြီးမှပဲ ထပ်လက်ခံဖြစ်မယ်။ ကြားထဲမှာတော့ ကြော်ငြာလေးတွေ၊ အမ်တီဗီလေးတွေ၊ ဓာတ်ပုံရိုက်လေးတွေအားရင်အားသလို ရိုက်ဖြစ်ပါတယ်။

-အရှေ့မှာလဲ ဗီယက်နမ်ကို ကြော်ငြာသွားရိုက်တာတွေ့ရတယ်နော်။

ဟုတ်ပါတယ်။ oishi ကြော်ငြာပါ။ အဲ့ဒီမှာ ၄ ရက်ကြာခဲ့ပါတယ်။ ကြော်ငြာရိုက်တာက နှစ်ရက်၊ နောက် ဗီယက်နမ်မှာရှိတဲ့ ကမ်းခြေမှာသွားလည်ခဲ့တာက ၂ ရက်ပေါ့။ ဒါရိုက်တာက သြစတေးလျကဒါရိုက်တာပါ။ အဲ့ဒီကိုသွားရိုက်တုန်းက ဟိုကလူတွေနဲ့အလုပ်အတူတူတွဲလုပ်ခွင့်ရတဲ့အတွက် အတွေ့အကြုံသစ်တွေရတယ်။ ပြီးတော့ ရှုတင်ပြီးတဲ့ အချိန်မှာလျှောက်လည်ခဲ့ရတဲ့အတွက်လဲ အရမ်းပျော်ပါတယ်။

-ယွန်းကိုအားပေးနေတဲ့ ပရိသတ်ကြီးကိုရော ဘာများပြောချင်သေးလဲ။

ယွန်းဆယ်တန်းဖြေပြီးကတည်းက ယွန်းအသက်အရွယ်နဲ့လိုက်မဲ့ အနုပညာလှုပ်ရှားမှုလေးတွေကို လုပ်ဖြစ်နေပါတယ်။ ထွက်လာရင်လဲ ယွန်းကိုယ်တိုင်အတတ်နိုင်ဆုံးကြိုးစားပြီးသရုပ်ဆောင်ထားတာဖြစ်တဲ့အတွက်ဝေဖန်ပြီးတော့ကြည့်ရှုအားပေးပေးပါဦးလို့ပြောချင်ပါတယ်။

trend myanmar မှ ကူးယူဖော်ပြသည်။
www.myanmarkidworld.com