Saturday, November 7, 2015

မိဘတွေ ပြသာနာနဲ့ကလေးတို့ရဲ့အနာဂတ်

 အိမ်ထောင်စုတစ်စုမှာ   အကြောင်းအရာ အမျိုးမျိုးတို့ကြောင့်  မိနဲ့ဘတို့ကကွဲကြပြဲကြပြီဆိုရင်  အထိခိုက်အနစ်နာဆုံးသူတွေမှာ  လူမမယ်ကလေးငယ်တို့ဘဲဖြစ်ပါတယ်။ လူကြီးတွေက  မိမိတို့စိတ်၊ဒေါသ၊မာနတို့နဲ့  တစ်ယောက်ကိုတစ်ယောက်  အနိုင်မခံအရှုံးမပေး  အားပြိုင်ပြီးလမ်းခွဲသွားကြချိန်မှာ   ကျန်ရစ်ခဲ့တဲ့ကလေးတို့ရင်မှာက ဒဏ်ရာတစ်ခုဖြစ်တည်ကျန်ခဲ့တတ်ကြပါတယ်။လူလို့ဖြစ်လာပြီဆိုရင်   အသက်ကြီးတယ် ၊ငယ်တယ် ပဓာနမဟုတ် ရင်ထဲမှာ ခံစားချက်တစ်ခုပြင်းထန်မှုရှိနေပြီဆိုပါက  ဘယ်သူမဆို မပေါ့ပါးနိုင်တော့တာအမှန်ပါ။  စိတ်ခံစားမှုလွယ်ကူကာ ပတ်ဝန်းကျင်နဲ့  သဟာဇာတဖြစ်မှုနည်းပါးလာကြတယ်။ အများအားဖြင့်  မိသားစုပြိုကွဲထားတဲ့  ကလေးငယ်တို့မှာ  စိတ်ခံစားထိရှလွယ်မှု   ပိုမိုများပြားတတ်ကြောင်း   စိတ်ပညာရပ်ဆိုင်ရာပညာရှင်တို့က   လေ့လာဖော်ပြထားကြပါတယ်။

ဒါဟာယေဘုယျအားဖြင့်   ဖြစ်လေ့ဖြစ်ထရှိကြပေမယ့်   မိခင်ကဖြစ်ဖြစ် ဖခင်ကဖြစ်ဖြစ်  ကလေးအပေါ်အပြည့်အဝ  တာဝန်ယူမှုနဲ့အတူ ကိုယ်စိတ်နှစ်ပါး   ကျန်းမာရွှင်လန်းစေဖို့  ဂရုစိုက်မှုပေးနိုင်တဲ့အခါ  ပုံမှန်မိဘတွေနဲ့ နေထိုင်ရတဲ့ကလေးတွေလို ခြားနားမှုမရှိဘဲ  တိုးတက်ဖွံ့ဖြိုးမှု ရှိကြပါတယ်။အဓိကအားဖြင့် မေတ္တာအကြည်ဓာတ်ရှိတဲ့ပတ်ဝန်းကျင်မှာ  ရှင်သန်ရသူတိုင်းဟာ ကျန်းမာရွှင်လန်းမှုရှိပြီး  ဥာဏ်ရည်ဥာဏ်သွေး ထက်မြက်ကြတယ်လို့ သိရပါတယ်။ မိဘနှစ်ပါးပြိုကွဲမှုကြောင့် ကလေးတို့အနေနဲ့ နာကျင်စရာတွေဖြစ်ရပေမယ့် ကောင်းမွန်တဲ့စောင့်ရှောက်အုပ်ထိန်းမှုတို့ရှိနေတဲ့အခါ  ကလေးတို့အနာဂတ်ဟာ   စိုပြေတောက်ပလင်းလက်နိုင်စွမ်းရှိကြပါတယ်။

ပုံမှန်မိဘအစုံအလင်နဲ့ နေထိုင်ကြရပေမယ့်  မိဘနှစ်ပါးကအမြဲတမ်းပြဿနာဖြစ်ပြီး  ကလေးတွေကို စိတ်ဝေဒနာဖြစ်စေတဲ့အခါ  ဒါဟာ ကလေးတို့ရဲ့အနာဂတ်ကို  ကြီးမားတဲ့ထိခိုက်စေမှုတစ်ခုဖြစ်ပါတယ်။ဒီလိုအခြေအနေမျိုးမှာ  မိဘအစုံအလင်နဲ့နေထိုင်ရပေမယ့်  ကလေးတို့အတွက်က မိသားစုဆိုတဲ့အနှစ်သာရဟာ   ပျောက်ဆုံးနေတတ်ကြပါတယ်။ စိတ်နာကျင်ခံစားမှုတွေနဲ့ တစ်ဖြည်းဖြည်းကြီးလာရင်း  ပတ်ဝန်းကျင်နဲ့ သဟဇာတမဖြစ်တော့ခြင်း ၊ ဆယ်ကျော်သက်အရွယ်ရောက်လာပြီဆိုရင်  စိတ်လေလွင့်ပြီးပျက်စီးခြင်း အစရှိတဲ့  မလိုလားအပ်တဲ့ပျက်စီးဆုံးရှုံးတို့ ဖြစ်ပေါ်လာကြရပါတယ်။

တစ်ခါတစ်ရံမှာ  တစ်စုံတစ်ခုကို  ဆုပ်ကိုင်မထားသင့်တဲ့အရာဖြစ်ပါကာ  လွှတ်ချလိုက်တာက ကိုယ်စီကိုယ်စီအတွက်  ပိုပြီး အန္တရာယ်ကင်းစေတတ်ပါတယ်။လွှတ်မချဘဲဆုပ်ကိုင်ထားမိပါက  ဆုပ်ကိုင်ထားသူကို အဆိပ်သင့်စေသလို  မိမိတို့ကို မှီခိုနေတဲ့  ကလေးတို့အပေါ်လည်း ပျက်စီးစေတာကြောင့်  မှန်ကန်တဲ့လုပ်ဆောင်ချက်တစ်ခုဖြစ်စေဖို့အရမ်းအရေးကြီးပါတယ်။ဓလေ့ထုံးစံကြောင့်၊ ပတ်ဝန်းကျင်ကြောင့်  အစရှိတဲ့ မလိုလားအပ်တဲ့ကိစ္စရပ်တွေအောက်မှာ ဖုံးလွှမ်းနေမိတဲ့အခါ မိမိအပါအဝင် မိမိရဲ့ရင်သွေးရတနာတို့ကို ပါ ပျက်စီးဆုံးရှုံးစေတတ်ပါတယ်။  ဒါကြောင့် မှန်ကန်တဲ့  ဆုံးဖြတ်ချက်အောက်မှာ  ပြတ်သားတဲ့လုပ်ဆောင်ချက်တွေနဲ့  မိမိဘဝကိုကယ်တင်သင့်သလို ရင်သွေးတို့ရဲ့  အနာဂတ်ကိုလည်း  ကယ်တင်သင့်ပါတယ်။

ဒါကြောင့် အိမ်ထောင်မှုတစ်ခုတည်ထောင်ကြပြီဆိုတဲ့အခါမှာ  မိဘတွေဖြစ်လာကြပြီး၊ မိဘတာဝန်ကို ထမ်းဆောင်နိုင်ဖို့ ကြိုတင်ပြင်ဆင်ထားဖို့လိုအပ်ပါတယ်။ မိမိတို့ရဲ့လိုအပ်ချက်၊ချို့ယွင်းချက် ၊စိတ်အလိုလိုက်မှုတို့ဟာ  မိမိတို့ရဲ့ရင်သွေးတို့အပေါ်များစွာ  ထိခိုက်နစ်နာစေတာကြောင့်ဖြစ်ပါတယ်။ အိမ်ထောင်မှုပြုသူတိုင်းအတွက်   ဆင်ခြင်ဥာဏ်၊  အမြော်အမြင်ရှိမှု၊  တာဝန်ကိုယ်စီကျေပြွန်မှု၊  စောင့်ထိန်းမှု၊  အပြန်အလှန်လေးစားမှု၊  နားလည်မှု၊ သစ္စာစောင့်သိမှု  အစရှိတဲ့အိမ်ထောင်ရေးကျင့်ဝတ်တို့ကို   အထူးလိုက်နာကျင့်သုံးမှု၊  မိသားစုစားဝတ်နေရေးအတွက်  အထူးကြိုးပမ်းအားထုတ်မှုတို့ဟာ  ကလေးတို့ရဲ့ဘဝကို နွေးထွေးလုံခြုံစေတာကြောင့်  တာဝန်ကိုယ်စီကျေပြွန်စေဖို့ အရမ်းအရေးကြီးလှပါတယ်။

မိမိမွေးထုတ်ပေးလိုက်တဲ့ကလေးငယ်တစ်ယောက်ဟာ  နောင်တစ်ချိန်မှာလူသားတွေကို  ဘယ်လိုအကျိုးပြုနိုင်မလဲ  မသိနိုင်တာကြောင့်  တန်ဖိုးရှိလူတော်လူရည်မွန်လေးတွေ  ဖြစ်တည်လာစေဖို့ မိဘတိုင်းမှာ များစွာတာဝန်ရှိပါတယ်။လူတော်လူမွန်တစ်ယောက်ဟာ ပတ်ဝန်းကျင်လောက ကို အကျိုးပြုသလောက်  လေလွင့်နေသူတစ်ယောက်အဖို့   ပတ်ဝန်းကျင်ကို  များစွာဒုက္ခဖြစ်စေပါတယ်။ ဒါကြောင့် တန်ဖိုးရှိတဲ့လူကောင်းသူမွန်တွေ မွေးထုတ်နိုင်စေဖို့ ကလေးတွေအပေါ်  နွေးထွေးကြင်နာစွာပြုစုစောင့်ရှောက်မှု၊  နည်းမှန်လမ်းမှန်ထိန်းကျောင်းပေးနိုင်မှုတို့ဟာ   အဓိကမဏ္ဍိုင်ဖြစ်ပြီး  ကလေးတို့အနာဂတ်ကိုပျက်စီးစေမယ့် အမှုကိစ္စတို့ကိုရှောင်ကြဉ်နိုင်ခြင်းဟာ  အကောင်းဆုံးဘဲဖြစ်ပါတယ်။

Credit: yangonlife မှ ကူးယူဖော်ပြသည်။